Azərbaycana qarşı 70 il davam edən Sovet təcavüzü 1990-cı ilin 20 Yanvar tarixində qanlı faciə ilə nəticələndi. Bakı küçələrinə axışan xalq erməni terrorçularının ərazi iddiası qaldıraraq regionlarda törətdikləri cinayətlərə öz etiraz səsini ucaltmışdı.  

1990-cı il yanvarın 19-dan 20-nə keçən gecə SSRİ müdafiə naziri Dmitri Yazovun rəhbərliyi altında qoşun hissələri müxtəlif istiqamətlərdən barrikadaları dağıdıb əliyalın əhaliyə ağır texnikadan və müxtəlif tipli silahlardan atəş açaraq şəhərə daxil oldular.

Bakı şəhərində yanvarın 20-si saat 00:00-da fövqəladə vəziyyət tətbiq edilməsi üzrə imzalanmış fərman səhər saat 5.30-da radio ilə elan olunmuşdur. Həmin vaxtadək 100-dən artıq dinc sakin qətlə yetirilmiş, yüzlərlə insan yaralanmışdır.

Belə ağır və müsibətli bir vaxtda xalqımızın vətənpərvər oğlu, ulu öndərimiz Heydər Əliyev Moskvada xüsusi nəzarət altında saxlanılmasına, təzyiq və təqiblərə məruz qalmasına baxmayaraq, yanvarın 21-də oğlu və silahdaşı İlham Əliyevlə birgə Azərbaycanın Moskvadakı nümayəndəliyinə gələrək, Sovet ordusunun Bakıda törətdiyi bu qanlı cinayəti kəskin pisləyən bəyanat verdi. Heydər Əliyev faciənin bütün günahkarlarının cəzalandırılmasını tələb etdi.

22 yanvar 1990-cı ildə şəhərin Dağüstü parkında ərazi bütövlüyü və müstəqilliyi uğrunda mübarizəyə qalxmış Azərbaycan xalqının qəhrəmanlıq abidəsi Şəhidlər xiyabanı yarandı. Həmin vaxtdan Şəhidlər xiyabanı xalqımızın müqəddəs and yerinə, ziyarətgahına çevrilib.